TIRANA INSTITUTE OF CONTEMPORARY ART ORGANZIES:

Çmimin për Artin Bashkëkohor ARDHJE

Dt. 03 Dhjetor, 2007, ora 19.00, pranë Galerisë së Akademisë së Arteve të Bukura, Tiranë.

Çmimi për Artin Bashkëkohor ARDHJE është veprimtaria më e re në skenën e artit shqiptar, e ideuar në bashkëpunim me Fondacionin për Shoqëri Civile në New York dhe me mbështetjen e Akademsë së Arteve të Bukura dhe Ambasadës Amerikane në Tiranë. Kjo veprimtari i shtohet gjerdanit të veprimtarive të TICA, përmes të cilave synohet zgjerimi i strukturave që ofrojnë një mbështetje të vazhdueshme për artistët shqiptarë, si dhe rritja e zhvillimit të dialogut dhe shkëmbimeve me artistë dhe profesionistë nga bota dhe rajoni.

Pas një periudhe të ngjeshur kërkimi, gjatë së cilës u zhvilluan vizita në studio, takime dhe pranime prezantimesh të dokumentimit të punës nga një numur i madh artistësh që jetojnë dhe punojnë në Shqipëri, stafi organizator i TICA përzgjodhi dhe ftoi për të marë pjesë në ekspozitën e Cmimit ARDHJE artistët në vijim: Theodoraq Napoloni, Yllka Gjollesha, Genti Gjikopulli, Leonard Qylafi, Era Tula, Fani Zguro dhe Irgin Sena. Ekspozita e Cmimit ARDHJE do të mbahet në mjediset e Galerisë së Akademisë së Arteve të Bukura, Tiranë, duke paraqitur një numur projektesh dhe punësh nga artistët e ftuar. Një Juri e përbërë nga Eleni Laperi, kuratore e lirë, Zef Paci, profesor i Historisë së Artit pranë AAB, dhe Elsa Demo, gazetare e kulturës pranë gazetës Shekulli, do të shqyrtojë punët e paraqitura në ekspozitë dhe do të përzgjedhë një artist/e si fitues/e të Cmimit për Artin Bashkëkohor ARDHJE, 2007. Fituesi/ja fiton të drejtën për të shkuar në New York të SH.B.A. për një pediudhë prej 6 javësh, në një rezidencë për artistë të ofruar nga Fondacioni për Shoqëri Civile.

Çmimi për Artin Bashkëkohor ARDHJE realizohet në bashkëpunim me Fondacionin për Shoqëri Civile dhe me mbështetjen e Akademisë së Arteve të Bukura dhe Ambasadës Amerikane në Tiranë. Gjatë vitit 2007 programet e Institutit të Artit Bashkëkohor, Tiranë kanë patur partneritetin e European Cultural Foundation dhe mbështetjen e Institutit të Bienales së Tiranës dhe OJF “Kultura në Lëvizje”.